Vår og ut på tur?

 

Denne gongen vil eg vise fram tre bøker som passar godt å ta med ut på tur. Ja, ein kan faktisk ta med bøker på tur, sjå berre her!

Boka «Venner med venger», handlar om Dina som blir venn med ein fugl som er utanfor vindauget hennar. I tillegg til denne fuglen får vi bli kjent med tjue andre av dei mest vanlege fuglane vi har. Denne boka kan ein lese når ein er ute på tur, kanskje du ser nokre av fuglane dei fortel om i boka? Her finn du meir om ender, kråker, spurv, gauk, lauvsongar og mange fleire.

I boka «Under ein stein», er det mykje spennande som du kan finne fram til sjølv når du er ute. Kva ser du om du løftar på ein stein? Kryp det fram noko? Veit du namnet på det? Kvar finn du edderkoppen, spretthalen, saksedyret og tusenbeinet? Eller skolopenderen? I boka får du vite kvar alle saman bur, kva dei et til middag og korleis dei ser ut. Ser du eit lite kryp kan du slå opp i boka og sjå om du finn det der.

Begge bøkene er skrive av Erna Osland og illustrert av Inger Lise Belsvik på Samlaget.

 

Den neste boka handlar om mat ein kan ete ute.

I boka «Et ute», kan du finne oppskrifter på mat ein kan lage og ete ute på tur. Her finn du baconpannekaker, taco på tur, pinnebrød, scones, spesialburger og vaflar og mykje meir. Her står det korleis du skal førebu deg heime, og korleis du lagar ferdig maten når du har kome ut. Om du ikkje går så mykje tur i fjellet eller i skogen, kan du like gjerne lage denne maten i ei bålpanne heime eller på eit bål i strandkanten.

Boka er skriven av Sigrid Henjum på Fri Flyt AS.

Alle desse tre bøkene kan du høyre om du får låne på ditt bibliotek, lukke til!

 

Mjau!

Beste helsing

Nokre godbitar..